Measann Banc Ceannais na hÉireann go dtógfar 32,500 áit chónaithe nua sa Stát i mbliana, ar laghdú de 1,500 é sin ón meastachán deireanach a d'fhoilsigh an banc trí mhí ó shin.
Rud eile de, tuarann an Banc Ceanais gur 37,500 áit chónaithe a thógfar an chéad bhliain eile, ar laghdú de 2,500 é sin ón meastachán deireanach i mí an Mhárta.
Ar a mhuin sin, measann an banc gur 41,500 áit chónaithe a thógfar in 2027, sin 2,500 níos lú ná mar a tuaradh cheana.
Má fhíorófar tairngreacht an bhainc, fágfaidh sé nach mbainfear amach spriocanna tithíochta an Rialtais agus go gcaithfear gúm nua a dhéanamh.
Ganntanas uisce agus nasc leictreachais, chomh maith le heaspa oibrithe tógála, is iad is siocair leis an meastachán diúltach, a deir an banc.
Ina cheann sin, tuarann an Banc Ceannais gur fás de 2% a thiocfas ar an ngeilleagar i mbliana, seachas an 2.6% a tuaradh cheana.
Fás de 2.1% a bheas ann in 2026, dar leis an mbanc, ar laghdú de 0.4% é sin ón meastachán deireanach.
Na taraifí atá na Stáit Aontaithe a ghearradh ar earraí ón Aontas Eorpach is cúis leis an athrú réamhaisnéise, a deirtear.
Os a choinne sin, ceapann an banc go dtiocfaidh fás ar olltáirgeacht intíre i mbliana mar gheall ar an líon mór táirgí cógaisíochta atáthar a easpórtáil chun na Stát Aontaithe faoi láthair sula dtiocfaidh feidhm le taraifí is déine.
Nuacht agus Cúrsaí Reatha RTÉ
